Mga Hakbang upang Makaiwas sa Sakit sa Puso

Peligroso ang pagkakaroon ng sakit sa puso o heart disease, dahil kung hindi ito maaagapan, maaari itong magdala ng mga nakamamatay na komplikasyon. Maraming pagkain, bagay, at mga nakaugaliang gawain ang maaaring magdulot ng naturang karamdaman. Importante ang mamuhay nang malusog at masaya kung ikaw ay iiwas sa mga sakit sa puso.

Kami ay naghanda ng ilang hakbang upang maiwasan ang nasabing sakit. Mahirap mang sundin ang ilan dito sa simula, magandang kalusugan at mas masayang pamumuhay naman ang iyong magiging gantimpala.

Magkaroon ng heart-healthy diet

Kumain ng mga pagkain na wala o kakaunti ang taba at mababa ang nilalamang kolesterol. Taba at kolesterol ang karaniwang bumubuo ng bara na naiipon sa mga ugat ng puso at nagpapakipot dito. Ito ang nagiging sanhi ng karamdaman na tinatawag na coronary heart disease, coronary arterial disease, at ischemic heart disease o ischemia.

Gawing regular ang pagkain ng gulay at prutas. Kung kakain ng karne, piliin ang tinatawag na ‘lean meats’ o karne na hindi mataba. Sa halip na baboy, kumain ng isda. Umiwas sa pagkain na sobrang alat at sobrang tamis.

Itigil ang paninigarilyo at pag-inom ng alak

Ang paninigarilyo at labis na pag-inom ng alak ay ilan sa mga sanhi ng sakit sa puso na maaaring iwasan. Mas malapit sa peligro ng atake sa puso ang mga taong naninigarilyo kumpara sa mga taong hindi naninigarilyo. Ang sobrang pag-inom ng alak naman ay nakakapagpataas ng presyon ng dugo at maaari ring magdala ng sakit sa atay. Iwasan ang bisyo upang mapangalagaan ang katawan.

Isaayos ang lebel ng kolesterol sa katawan  

Malapit sa sakit sa puso ang mga taong may high cholesterol. Hindi kagulat-gulat ang pagkakaroon ng sakit sa puso ng isang tao kung ang lebel ng kolesterol niya ay lampas sa 200, gayun din ang pagkakaroon ng mababang good cholesterol (HDL) levels at labis na dami ng bad fat. Maisasaayos mo ang mga ito kapag kumain ng fiber-rich foods at mag-ehersisyo araw-araw. \

Gawing normal ang presyon ng dugo

Isa sa karaniwang sanhi ng sakit sa puso ay ang mataas na presyon ng dugo. Para makatulong sa pagkontrol ng presyon ng dugo, mag-ehersisyo, kumain ng tama, magkaroon ng positibong pananaw sa buhay, maging kalmado, at kung ipapayo ng doktor, uminom ng gamot para dito.

Magkaroon ng aktibong pamumuhay

Mag-exercise! Ang pagkakaroon ng aktibong pamumuhay ay isang paraan para makalayo sa sakit sa puso. Bukod dito, ang madalas na pag-eehersisyo ay nagsisilbing panangga ng iyong katawan sa iba’t-ibang uri ng karamdaman, susi sa pagpapapayat, at magandang hakbang upang maka-iwas sa stress.

Manatili sa tamang timbang

Kapag overweight ang isang tao, ito ay nagdudulot ng stress sa puso. Kung ang isang tao ay nasa tamang timbang, siya ay makakaiwas sa high blood. Komunsulta sa doktor para malaman ang tamang timbang alinsunod sa gulang at katangkaran. Bibigyan ka rin niya ng mga payo ayon sa iyong eksaktong kondisyon at gamot kung kinakailangan.

Iwasan ang stress at pagkagalit  

Madalas ipayo ng mga doktor sa mga taong nasa peligro na magkaroon ng sakit sa puso ang pag-iwas sa stress. Ang stress at galit ay may masasamang epekto sa puso at maaaring magdulot ng sari-saring sakit.

Alisin ang mga bagay o layuan ang mga sitwasyon na nagsasanhi ng stress. Kung kinakailangan, maaaring ilabas ang tensyon sa pag-eehersisyo o matutong mag-meditate. Tandaan na ang payapang utak ay nakakatulong sa pag-iwas sa mga seryosong sakit.

Sources:

• http://www.webmd.com/heart-disease/guide/heart-disease-risk-factor