Home Remedies alang sa Ubo ug Plema sa Bata

Si bunso adunay grabe nga ubo ug plema. Naglisod kini  sa pagginhawa, sakit ang tutunlan ug dili makatulog matag gabii. Apil sab si Mommy makuwangan sa pahuway. Luoy paminawon ang padayon nga pag-ubo sa bata apan dili kita sigurado kung unsa ang angay itambal kaniya. Unsa kaha ang maayong buhaton?

Tambal Alang sa Ubo sa Bata

Ang kasagaran nga over-the-counter nga tambal aron pugngan ang ubo dili dayon ginarekomenda sa mga doktor alang sa mga bata. Kini tungod ang mga formulation niini angay lamang sa mga hamtong. Kung ugaling gamiton kining mga tambala alang sa bata, gikinahanglan gayod ang pagkonsulta sa doktor alang sa tamang dosage.

Importante sab nga mahibal-an sa ginikinan nga dili tanang ubo delikado ug kinahanglan dayon alibyohan. Ang mga mild nga ubo makatanggal sab sa mucus sa airway sa respiratory tract ug gatabang aron makaginhawa og tarong, maong kasagaran ang maong klase sa ubo ginapasagdan lang nga maayo og iyaha.

Apan kung ang bata adunay grabe na nga mga sintomas, mamahimo na kini nga mahimong sakit o hilanat. Posible sab kining hinungdan sa pagpanakit sa dughan o baga ug tutunlan. Sa maong sitwasyon, gikinahanglan na nga mahatagan og paspas nga alibyo ang maong bata. Aron sigurado, mamahimong tistingan ang mga praktikal nga home remedies alang sa inyong mga anak:

Home Remedies for Cough and Cold

https://www.shutterstock.com/image-photo/sweet-honey-jar-surrounded-spring-acacia-1990285826

1. Honey

Matud pa sa medical studies, ang honey (ilabina ang raw honey) usa ka natural na tambal sa dry cough. Aduna kiniy natural na anti-inflammatory properties nga mamahimong mopakalma sa agresibo nga ubo. Ang katam-is niini mao ang ga-stimulate sa salivary glands nga maoy gatabang aron mamenusan ang katol o irritation sa tutunlan.  Alang sa inyong mga kids, pwede ninyo kini paimnun ug usa ka basong tubig nga adunay sagul nga ½ hangtud 1 teaspoon nga honey bag-o matulog. Mamahimo sab nga butangan og 1 teaspoon nga apple cider o fresh lemon juice tungod aduna sab kiniy antioxidants.

Hinumdumi lamang nga ang honey ginadili o bawal sa mga baby nga 1 year old paubos. Kini tungod dili pa kaya sa mga gagmay’ng mga bata nga motulon og honey ug pwede kini nga mahimong rason aron sila matuk-an. Pwede sab kini mamahimong hinungdan sa infant botulism, usa ka matang sa usa ka seryoso nga food poisoning. Siguraduha nga ang inyong anak naa na sa insaktong edad ug kadak-on bag-o kini hatagan og honey.

2. Chicken Soup

Nailhan nga alibyo sa ubo ug sip-on gikan sa atong mga katigulangan mao ang chicken soup. Bisan pa man dili kini tambal, apan usa kini sa mga epektibong home remedies alang sa ubo para sa mga bata. Ang chicken soup gahatag ug importante nga fluids nga gikinahanglan alang sa usa ka dehydrated nga panlawas. Kasagaran aduna kiniy rekado nga ahos, sibuyas ug luy-a nga makatabang aron mahimong lig-on ang immune system sa usa ka tawo. Ang init sa sopas gatabang usab aron ma-abli ang nasal airways ug mamenusan ang congestion.

Dili sab ikalimod ang pagluto ug pag-andam sa chicken soup nga adunay sagol nga paghigugma ngadto sa bata, usa sab sa dakong rason aron mamahimong paspas ang iyang pagkaayo. Maong mga Mommy ug Daddy, hinumdumi nga ang pinaka-effective gihapon nga natural remedies sa ubo, sip-on ug hilanat mao ang paghigugma ug pag-atiman kanila.

3. Chest Rub

 Ang vapor rub mao ang usa sa kasagaran nga remedy sa ubo ug sip-on ug halos tanang banay adunay vapor rub. Ang regular nga vapor rub hinimo gikan sa camphor, eucalyptus oil, ug ang menthol ug kining maong mga contents adunay cough suppressant ug topical analgesic. Aduna say vapor rub nga specially formulated alang sa mga bata ug mao kini ang ginatawag nga non-medicated baby rub. Pwede kini himuong usa sa mga home remedies alang sa ubo.

Magbutang lamang og gamay’n baby rub nga mao kadako sa 10-centavo coin ug  ipahid kini sa dughan ug liog sa mga bata. Pasuoton lang ug luag nga sinina ang bata aron dali lang malukop sa vapors ang tibuok lawas niini.  Ayaw ibutang sa ilong o sa ilalom sa ilong ang vapor rub tungod ang isog nga camphor content niini dili angay sa gamay nga nasal airways sa tawo.

Hinumdumi nga ang regular chest rub dili gina-rekomenda alang sa mga bata nga duha katuig paubos pero ang specially formulated baby rub kay pwede ra sa mga bata nga tulo ka bulan pataas.

4. Tubig ug Asin

Usa ka simple nga dry cough treatment nga dili kinahanglan gastuhan mao ang pagpanlimugmug o pag-gargle og tubig nga adunay asin. Ang asin ga-absorb og tubig sa lawas. Mosuyop kini og tubig gikan sa tissues sa atong tutunlan nga maoy gatabang aron mamenusan ang paghubag niini.

Isagul ang ¼ hangtud ½ teaspoon nga asin sa usa ka baso nga tubig. Ipalimugmog kini sa bata nga anaa sa unom katuig pataas. Siguroha nga kahibalo na molimugmog ang inyong anak og tubig aron dili kini niya mainom. Kini nga pamaagi dili angay alang mga sa mga gagmay’ng bata o mga babies.

5. Itaas ang Ulo

Lisod alang sa adunay plema ang pagginhawa ug tarong ilabina kung nakaflat kini sa iyang higdaanan. Aron maka-agi ang oxygen sa respiratory system, kinahanglan itaas gamay ang ulo niini.

Butangi og unlan ang ilalom sa ulo sa bata o di kaha sa itaas nga ulohang parte sa crib o higdaanan.

Hinumdumi nga mas gikinahanglan ang pag-amping kung mag-atiman sa mga newborn o gagmay’ng bata nga anaa sa usa katuig paubos. Dili ginarekomenda ang pagbutang og daghang unlan sa crib tungod mamahimo kining hinungdan sa suffocation sa bata.

6. Pag-inom ug Daghang Liquids

Sa bisan unsang balatian sa respiratory system, kinahanglan ang pag-inum ug daghan liquids ilabina ang tubig aron maflush out sa sistema sa bata ang unsa mang bacteria o virus nga maoy hinungdan sa grabeng ubo ug plema. Ginadili ang mga imnunon nga adunay daghang asukal sama sa fruit juice o soft drinks tungod ang asukal niini maoy gapasamot sa karat sa tutunlan.

7. Limpyo nga Hangin ug Palibot

Nagkalain-lain ang posibleng hinungdan sa pag-ubo sa inyong anak, usa ana mao ang allergies. Pwede nga allergic siya sa abog, balahibo sa hayop, pinaakan sa insekto ug uban pa. Kung kita wala masayod sa allergy sa atong mga anak, ang pinaka-praktikal nga solusyon mao ang paglimpyo sa palibot sa atong mga anak. Atong siguraduhon nga limpyo ug bag-ong laba ang mga bed sheets ug pillowcase sa mga bata ug gaginhawa sila sa limpyo nga hangin matag-adlaw. Ilayo sab nato sila sa aso sa sigarilyo.

https://www.shutterstock.com/image-photo/happy-asia-little-child-girl-smiling-504698389

8. Cough Medicine

Ang tambal alang sa ubo ginahatag lamang sa bata isip last resort ug kung kini gikinahanglan gyud. Ang Dextromethorpan Hydrobromide mamahimong gamiton sa bata nga adunay dry cough. Kini usa ka over-the-counter cough suppressant nga mamahimong mohatag og temporaryong alibyo sa grabe nga pag-ubo. Ang tama nga dosage niini gadepende sa edad ug timbang sa maong bata. Mas maayo nga mokunsulta sa doctor aron mahatagan ug eksaktong prescription. Pwede kini sa mga bata nga nag-edad ug upat katuig pataas.

Kanus-a kinahanglan motawag og doktor?

1. Kung adunay hilanat ang bata;
2. Kung ang ubo adunay sintomas nga “croup” ug sama sa gapaghot nga pag-ubo ug adunay talinis nga taghoy ug pagkapagaw;
3. Kung ang ubo adunay kaubang asthma;
4. Kung adunay dugo ang pag-ubo; ug
5. Kung moabot na ug duha ka semana ang mga sintomas.

Ang sayo nga pagsusi sa mga sintomas sa inyong anak mao ang pinakamaayong solusyon alang sa ubo ug uban pang balatian sa bata. Kung dili sigurado sa tambal niini, dili gayud magduha-duha nga dalhon kini dayon sa doktor.