Nakaramdam ka ba ng pananakit ng kasukasuan o joints? Maaring ito ay dahil sa arthritis. Ang iba naman ay tinatawag itong arthralgia. Pareho kasing may kinalaman sa pananakit ng katawan at kasukasuan ang dalawa.
Ano nga ba ang pinagkaiba ng arthritis at arthralgia? Mahalagang malaman ang pagkakaiba ng mga ito para matukoy ang wastong lunas sa iyong tunay na karamdaman.
Arthralgia vs Arthritis
Ang arthralgia ay tumutukoy sa pananakit ng kasukasuan o joint. Kung higit sa isa ang sumasakit na bahagi o joints, tinatawag itong polyarthralgia. Kadalasan, hindi maigagalaw ng taong may arthralgia ang kasukasuan dahil sa pagkakaroon ng stiffness o paninigas. Maaaring makaranas ng joint pain o arthralgia kahit walang pamamaga o inflammation sa kasukasuan.
Ang arthritis naman ay ang pamamaga ng kasukasuan na nagdudulot ng pananakit nito. Depende sa sintomas, may iba’t-ibang uri ng arthritis. Isa na rito ang osteoarthritis kung saan ang litid (cartilage) sa kasukasuan ay unti-unting nasisira o nagiging manipis. Tinatawag din itong “wear and tear” arthritis. Kadalasang nararamdaman ang osteoarthritis sa kamay, bewang at tuhod.
Ang isa pang uri ng arthritis ay ang rheumatoid arthritis. Ito ay isang autoimmune disease o sakit kung saan hindi matukoy ng immune system ng katawan kung alin ang healthy at foreign cells. Dahil dito, inaatake nito lahat ng selyula. Bilang resulta, nagkakaroon ng pamamaga sa kasukasuan.
Source: https://www.shutterstock.com/image-photo/soft-focus-knee-joint-woman-get-728208574
Arthralgia Causes
Maraming pwedeng maging sanhi ang arthralgia o joint pain. Ito ay maaaring dulot ng arthritis, sugat sa litid at kasukasuan, at mga nakakahawang impeksyon tulad ng flu, tigdas at beke. Maaari ring magdulot ng arthralgia ang mga karamdaman tulad ng lupus at cancer sa buto.
Isa rin ang lifestyle sa maaring maging risk factor sa pagkakaroon ng joint pain. Hindi lamang dahil sa pagkain na nagdudulot ng obesity ang maaaring magdulot ng sakit sa kasukasuan kundi maging ang mga injury o pagkabali ng buto na dulot ng sports at iba pang physical activities.
Arthralgia at Arthritis Symptoms
Ang mga sumusunod ang sintomas ng arthralgia:
- Pananakit ng kasukasuan o joint pain
- Paninigas ng kasukasuan
- Hirap sa pagkilos
Ang mga sumusunod ang sintomas ng arthritis:
- Pamamaga ng kasukasuan
- Pananakit ng kasukasuan o joint pain
- Paninigas ng kasukasuan
- Hirap sa pagkilos
Arthritis man o arthralgia, pareho itong nagdudulot ng pananakit ng kasukasuan nanakakalimita sa pang araw-araw na mga gawain. Upang maiwasan ang joint pains, mahalaga ang pagkakaroon ng healthy lifestyle. Kasama na rito ang pagkakaroon ng balanced diet at regular exercise. Kung mayroon sumasakit na bahagi ng katawan, mahalagang huwag itong baliwalain. Kumunsulta sa doktor para malaman ang tunay na sanhi ng pagkasakit ng kasukasuan at mabigyan ng tamang treatment.
Sources:
https://www.hopkinsmedicine.org/health/conditions-and-diseases/arthralgia
https://www.painscale.com/article/what-is-the-difference-between-arthralgia-and-arthritis
https://www.cdc.gov/arthritis/basics/rheumatoid-arthritis.html
